Qubadlı-Eyvazlı avtomobil yolu boyunca geniş miqyaslı tikinti işləri davam etdirilir

Bakı, 22 avqust, AZƏRTAC. Dövlətimizin başçısının tapşırığı ilə Qarabağ və Şərqi Zəngəzur iqtisadi rayonları ərazisində icra olunan, işğaldan azad edilmiş rayon və kəndlərin sosial - iqtisadi inkişafında mühüm rol oynayacaq yol infrastrukturu layihələrindən biri də Qubadlı-Eyvazlı avtomobil yoludur.

Azərbaycan Avtomobil Yolları Dövlət Agentliyinin İctimaiyyətlə əlaqələr şöbəsindən AZƏRTAC-a bildirilib ki, 28,5 kilometr uzunluğa malik Qubadlı - Eyvazlı avtomobil yolu 2 zolaqlı olmaqla, IV texniki dərəcəyə uyğun olaraq inşa edilir. Qubadlı rayonunda çətin relyefə malik ərazidən keçərək Eyvazlı kəndinə gedən avtomobil yolu boyunca geniş miqyaslı tikinti işləri davam etdirilir:

- 0-5-ci kilometrdə yol yatağının tikintisi işləri aparılır;

- 5-6-cı kilometrdə yol yatağının tikintisi yekunlaşıb;

- 6-14-cü kilometrdə yol yamaclarının qırıcı üsulu ilə layihə səviyyəsinə gətirilməsi işləri icra olunur;

- 14-15-ci kilometrdə yol yatağının tikintisi işləri yekunlaşmaq üzrədir;

- 15-20-ci kilometrdə yol yamaclarının layihə səviyyəsinə gətirilməsi üçün tikinti işləri davam edir;

- 20,9-21-ci kilometrdə yol yatağının tikinti işləri son mərhələdə olmaqla aparılır;

- 21-22-ci kilometrlik hissəsində yol yatağının profilə salınması və dolğu işləri son mərhələ üzrə icra olunur;

- 23-25-ci kilometrlik hissədə yol yatağının tikintisi artıq yekunlaşıb;

- 27-28-ci kilometrlik hissədə isə dolğu işləri və yeni yol yatağının inşası işləri həyata keçirilir;

- 28,5-ci kilometrlik hissədə yararsız qruntun və torpaq yatağının genişləndirilməsi üçün bitki qatının çıxarılması, qazma, əks dolğu, dağ yamaclarının kəsilməsi, dağlarda qırıcı üsulu ilə yol yatağının layihə səviyyəsinə gətirilməsi və tikintisi icra edilir.

Yeni inşa olunan yol boyunca layihəyə uyğun suların ötürülməsini təmin etmək məqsədilə müxtəlif diametrlərə malik dairəvi boru, düzbucaqlı su keçidlərinin və alt keçidlərin, həmçinin avtomobil körpülərinin inşası aparılır:

- 24-24.44 kilometrdə yerləşən düzbucaqlı su keçidinin ilkin təməl beton işləri,

- 0-0,5 kilometrdə suötürücü beton borunun tikintisi aparılır;

- 2.5-ci kilometrdə inşa olunan 122.4 metr uzunluğa malik 4 aşırımlı körpüdə svay işləri yekunlaşıb, qazma və betonlama işləri icra olunub;

- 21-ci kilometrdə tikilən 66 metr uzunluğa malik 2 aşırımlı avtomobil körpüsündə svay betonlama işləri aparılır. Körpünün A1, A2 dayaqlarında tikinti işləri yekunlaşmaq üzrədir, P2 dayağının təməlində betonlama işləri icra olunur.

Xüsusi texnikalardan istifadə olunmaqla görülən “İnşaat Norma və Qaydaları”na uyğun olaraq, işlərin zamanında və keyfiyyətlə yerinə yetirilməsi üçün tikinti ərazisinə lazımı sayda texnika və canlı qüvvə cəlb edilib.

Tikintinin qısa müddət ərzində icra olunmasını təmin etmək məqsədilə ərazidə düşərgə inşa edilib. Düşərgədə asfalt-beton zavodu, beton zavodu və qum-çınqıl zavodu, maşın-mexanizmlərin saxlanması və xidməti üçün xüsusi ərazi, həmçinin işçilər üçün hər bir şəraiti olan ofis, yeməkxana və dincəlmək üçün yerlər qurulub.

Qubadlı-Eyvazı avtomobil yolu Qubadlı rayonun Mahmudlu, Xıdırlı, Müskanlı, Məlikəhmədli, Qudanlı, Davudlu, Eyvazlı kəndlərinin ərazisindən keçir.

https://azertag.az/xeber/2261936