Respublikamızın ilk qeyri-hökumət təşkilatlarından olan “Zəngəzur” Cəmiyyətləri İctimai Birliyi may-iyul aylarında “Şərqi Zəngəzur - Quruculuq və Böyük Qayıdışın ünvanı” layihəsi çərçivəsində genişmiqyaslı maarifləndirmə, informasiya tədbirləri həyata keçirib.
QHT Bakı, Lənkəran, Astara və Sabirabaddan olan, 44 günlük Vətən müharibəsində Şərqi Zəngəzur bölgəsinin Cəbrayıl, Zəngilan və Qubadlı rayonlarında erməni işğalçılarına qarşı döyüşlərdə igidlik göstərərək şəhidlik zirvəsinə yüksəlmiş əsgərlərimizin valideynləri və qazilərin həmin torpaqlara səfərlərini təşkil edib. Şəhid Mahsun Bağırzadənin atası Zahir Bağırov, şəhid Bəxtiyar Mayılovun atası İxtiyar Mayılov övladlarının Qubadlıda şəhid olduqları məkanı onların səngər yoldaşları, son döyüşlərinin şahidləri - baş leytenant Elnur Talıbov, II qrup əlil Möhnət Səmədovun, bir qrup alim və yazarın iştirakı ilə ziyarət ediblər, onların qulluq etdiyi hərbi hissənin şəxsi heyəti ilə görüşüblər. Şərqi Zəngəzurda aparılan genişmiqyaslı dirçəliş, quruculuq, qayıdış, məskunlaşma işləri ilə tanış olublar.
Bu günlərdə birliyin sədri, yazıçı-publisist, tarix üzrə fəlsəfə doktoru Hacı Nərimanoğlunun “Şərqi Zəngəzur – Quruculuq və Böyük Qayıdışın ünvanı” kitabı nəşr olunub. “Prezident İlham Əliyev Şərqi Zəngəzurun bərpasının və Böyük Qayıdışın memarıdır” adlı “Ön söz”lə açılan kitabda Azərbaycan Prezidenti, Müzəffər Ali Baş Komandan İlham Əliyevin rəhbərliyi, sarsılmaz siyasi iradəsi, qətiyyətli sərkərdəlik bacarığı sayəsində xalqımızın və rəşadətli ordumuzun 44 gün davam edən Vətən müharibəsində qazandığı möhtəşəm Zəfərdən dərhal sonra Şərqi Zəngəzur iqtisadi rayonunda başlanan genişmiqyaslı işlər əks olunub. Nəşrin elektron variantı Birliyin saytında yerləşdirilib-https://zengezur.com/KITABLAR/son-zengezur.pdf
AMEA Mərkəzi Elmi Kitabxanasında (MEK) kitabın təqdimatı olub. Kitabın daha geniş auditoriyaya çatdırılması üçün çox sayda nüsxələri Qeyri-Hökumət Təşkilatlarına Dövlət Dəstəyi Agentliyi və Azərbaycan Milli QHT Forumunun birgə təşkilatçılığı ilə Zəngilan rayonundakı Konqres Mərkəzində keçirilən Azərbaycan QHT- lərinin Əməkdaşlıq Forumunun iştirakçılarına, QHT və KİV mənsublarına, Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Azərbaycan Respublikası Prezidentinin xüsusi nümayəndəliyinə, Qərbi Azərbaycan İcmasına, Elm və Təhsil Nazirliyinin Şərqi Zəngəzur Regional Təhsil İdarəsinin, Mədəniyyət Nazirliyinin Şərqi Zəngəzur Regional Mədəniyyət İdarəsinin kitabxanalarına, M.F.Axundzadə adına Milli Kitabxanaya təqdim olunub.
Heydər Əliyev adına Hərbi İnstitutda keçirilən "Kitabın gənclərin hərbi vətənpərvərlik tərbiyəsinə təsiri" mövzusunda tədbirdə “Şərqi Zəngəzur - Quruculuq və Böyük Qayıdışın ünvanı” kitabının təqdimatı olub, müəllif tərəfindən kitabın nüsxələri İnstitutun kitabxanasına və MN-nin İdeoloji və Mədəniyyət Mərkəzinə hədiyyə edilib.
AMEA-nın Lənkəran Regional Elmi Mərkəzində layihənin fəaliyyət planına uyğun olaraq “Azərbaycan Respublikasında iqtisadi rayonların yeni bölgüsü haqqında” Azərbaycan Respublikasının Prezidenti İlham Əliyevin 7 iyul 2021-ci il tarixli Fərmanının 3 illiyinə həsr olunmuş “Şərqi Zəngəzuru Ana Vətənə qovuşduran siyasət” mövzusunda dəyirmi masa keçirilib. Layihə rəhbəri Hacı Nərimanoğlunun videotəqdimatında Vətən müharibəsində qələbənin ilk günlərindən başlayaraq Şərqi Zəngəzur ellərində həyata keçirilən irimiqyaslı bərpa, quruculuq, məskunlaşdırma işləri əks olunub, sözügedən kitab elektron tabloda təqdim edilib, iştirakçıların sualları cavablandırılıb. İştirakçılara “Şərqi Zəngəzur – Quruculuq və Böyük Qayıdışın ünvanı” kitabının nüsxələri təqdim olunub. Tədbirdən sonra Vətən müharibəsində canlarını fəda etmiş lənkəranlı şəhidlərin məzarları, xatirə abidələri, muzeyləri ziyarət olunub.
Qeyri-Hökumət Təşkilatlarına Dövlət Dəstəyi Agentliyinin donorluğu ilə may-iyul aylarında həyata keçirilən, icrası başa çatdırılan layihə ilə bağlı respublika mediasında, sosial şəbəkələrdə 50-dən çox informasiya yayılıb.
