13 sentyabr 2022-ci il tarixdə “Zəngəzur” Cəmiyyətləri İctimai Birliyinin İdarə Heyəti və Ağsaqqallar Şurası Bəyanat yaymışdır. Bəyanatda deyilir:

Müdafiə Nazirliyi Ermənistan silahlı qüvvələrinin 12 sentyabr 2022-ci il tarixdə gecə saatlarında başlayaraq atəşkəs rejimini kobud şəkildə pozaraq, müxtəlif növ silahlardan istifadə etməklə Laçın, Kəlbəcər, Daşkəsən rayonları istiqamətində yerləşən Azərbaycan Ordusunun bölmələrinin mövqelərini intensiv atəşə tutması,  nəticədə əsgər və zabitlərimiz şəhid olduğu barədə məlumat yaymışdır.

"Zəngəzur" Cəmiyyətləri İctimai Birliyi təcavüzkarları lənətləyir, şəhid hərbi qulluqçularımızın ailələrinə və yaxınlarına dərin hüznlə başsağlığı verir, səbir diləyir, başın sağ olsun, Vətən!

Birliyin İdarə Heyəti və Ağsaqqallar Şurası bununla bağlı Azərbaycan Ordusunun ölkəmizin sərhədləri daxilində bir sıra hərbi-strateji əhəmiyyətli hakim yüksəklikləri nəzarətə götürməsini, Milli Ordumuzun qətiyyətli cavab tədbirlərini dəstəkləyir, Azərbaycan ərazilərində qanunsuz erməni silahlı qüvvələrinin mövcudluğuna son qoymaq, Qarabağ və Şərqi Zəngəzurun bütün ərazisində Azərbaycanın hərbi-siyasi nəzarətini təmin etmək üçün apardığı anti-terror əməliyyatlarını dəstəkləyir.

Eyni zamanda Azərbaycan Silahlı Qüvvələrinin Ali Baş Komandanından belə halların qarşısının birdəfəlik alınması, ölkəmizin ərazi bütövlüyünün, suverenliyinin tam təmini, iki dövlət arasında etibarlı sülhün bərqərar olması, keçmiş məcburi köçkün əhalinin doğma yurdlarına qayıdıb təhlükəsiz yaşaması üçün birinci addım olaraq, Laçın dəhlizinə hərbi nəzarətin tamamilə rus sülhməramlılarından alınıb Azərbaycan silahlı qüvvələrinin, ilk növbədə sərhəd qoşunlarının ixtiyarına verilməsinin tam reallaşmasını gözləyirik, bu taleyüklü şərəfli missiyanın yaxın zamanlarda gerçəkləşəcəyinə ümid edirik. 

Zəfərlər səninlə olsun, Azərbaycan Ordusu! 

“Zəngəzur” Cəmiyyətləri İctimai Birliyinin İdarə Heyəti və Ağsaqqallar Şurası adından

 Sədr                             Hacı Nərimanoğlu

13.09.22