Lətif müəllim Məhərrəmovun vəfatına

Uzun illər Qubadlı rayonunun Dondarlı kənd orta məktəbində müəllim, direktor işləmiş dəyərli ziyalımız, Qarabağ müharibəsi veteranı Hacı Lətif Fərhad oğlu Məhərrəmov haqq dünyasına qovuşdu. Lətif müəllim respublikamızda ən savadlı riyaziyyat müəllimlərindən biri olub, yüzlərlə şagirdinə bu elmi sevdirib, qapı açıb, riyazi biliklərə yiyələnməsi üçün elmini, biliyini, təcrübəsini coşqun həvəslə, zövqlə həsr edib, onlarla yetirməsi ölkəmizin tərəqqisinə töhfə verib, sinif müəllimi olmuş Mələk xanımla birlikdə layiqli övladlar böyüdüb. Lətif müəllimin əməyi çox sayda dövlət təltifinə, fəxri adlara layiq görülüb.

Lətif müəllim şəxsi əxlaqi-mənəvi keyfiyyətləri, ailə dəyərlərinə sədaqəti, imanı, xeyirxahlığı ilə daim müəllim adının şərəfini uca tutub, örnək olub.

Doğulduğu, daim həsrətini çəkdiyi Qubadlıdan uzaqda Saray qəbirsanlığında dəfn mərasimində çıxış edən keçmiş şagirdləri - hacı Həmdullah Əfəndiyev, hacı Müntəxabb Mirsədizadə, mühəndis-texnoloq Yaqub Yaqubov, neftçi-mühəndis Aslan Allahverdiyev, siyasi elmlər doktoru Fətəli Abdullayev, polkovnik Sadiq Paşayev, tikinti mühəndisi Yavər Zeynalov, fəlsəfə doktoru Hacı Nərimanoğlu və başqaları sevimli müəllimlərinin mənalı ömür yolundan danışıblar, əziz xatirəsini hər zaman yaşadacaqlarını bildiriblər.

“Zəngəzur” Cəmiyyətləri İctimai Birliyinin İdarə Heyəti və Ağsaqqallar Şurası Lətif müəllim Məhərrəmovun vəfatından kədərləndiyini bildirir, mərhumun ailəsinə, doğma, əzizlərinə dərin hüznlə başsağlığı verir.

Allah rəhmət eləsin!

"Zəngəzur” Cəmiyyətləri İctimai Birliyi İdarə Heyətinin sədri Dr. Hacı Nərimanoğlu