Türkiyənin Azərbaycandakı hərbi xidmət qüvvələrinin komandanı, Azərbaycanın müdafiə nazirinin müşaviri Bəxtiyar Ersay paşa Prezident Rəcəb Tayyib Ərdoğanın sərəncamı ilə Türkiyə Silahlı Qüvvələri Quru Qoşunlarının Birinci Ordusunun komandanı təyin edilib. Bu, Türkiyənin əsas ordu birləşməsidir və qərargahı İstanbulda yerləşir. Paşamız artıq yeni vəzifəsinin icrasına başlayıb. Xeyirli, uğurlu olsun, hər zaman xoş sorağın gəlsin, Bəxtiyar Ərsay paşa!
Prezident, Ali Baş Komandan İlham Əliyevin sərkərdəliyi ilə 2020-ci ilin sentyabr-noyabrında 44 günlük Vətən müharibəsi və 2023-cü ilin sentyabrında 23 saat davam edən anti-terror əməliyyatı sayəsində Qarabağ və Şərqi Zəngəzurda 30 ilədək davam etmiş rus-erməni işğalına birdəfəlik son qoyuldu.
Türkiyədə PKK-ya qarşı hərbi əməliyyatların hazırlanıb həyata keçirilməsində peşəkar təcrübəyə malik Bəxtiyar Ərsay paşanın bu tarixi qələbələrin qazanılmasında rolu misilsizdir.
Bəxtiyar Ərsay paşa 1918-ci ildə Osmanlı ordusunun generalı, Qafqaz İslam Ordusunun komandanı Nuru paşanın missiyasının davamı olaraq son 5 ildə Türkiyə Prezidenti, Silahlı Qüvvələrin Baş Komandan R.T.Ərdoğanın təlimatı ilə həmin qardaşlıq əhdi-vəfasını şərəf və ləyaqətlə yerinə yetirib.
Xalqımız Nuru paşanın, R.T.Ərdoğanın və Bəxtiyar Ərsay paşanın Azərbaycana sədaqət və xidmətlərini heç vaxt unutmayacaq!
Allah qorusun, yolun açıq olsun, Paşam!
Dr.Hacı N.Abdulla